中環出更：議監會查捐款醜聞 肥佬黎未審先驚
平生不做虧心事，半夜敲門也不驚，但偏偏有人驚到有得震無得瞓，唔通做得衰嘢多？壹傳媒集團前主席黎智英（肥佬黎）向泛民主派多位立法會議員秘密捐款一事，立法會議員個人利益監察委員會（議監會）決定展開調查，今個星期六會舉行第一次聆訊，聽講未有邀請肥佬黎受審，但肥佬黎已經未審先驚，講明今個月唔得閒出席聆訊。點解佢要咁驚青呢？真係只有佢至知喇。
未到佢就預先話唔到
議監會年初決定調查社民連梁國雄及工黨李卓人，有關佢哋分別收取肥佬黎五十萬元及一百五十萬元秘密捐款一事。議監會主席葉國謙證實，未來幾次閉門會議都會邀請所有相關人士到立法會協助調查，至於今個星期六嗰場聆訊有無肥佬黎份，葉就斬釘截鐵話無。不過，有報道就話肥佬黎已去信議監會，話無時間出席六月份聆訊，要到七月至有時間喎。
既然議監會主席都話今個星期六未有邀請肥佬黎，咁肥佬黎仲點解要話自己唔得閒出席會議呢，真係令人摸不着頭腦，莫非肥佬黎好驚被議監會委員審問？其實避得一次未必避到第二次，再者議監會唔到你話唔嚟就唔嚟，如果真係要肥佬黎出席受審，隨時可引用《立法會（權力及特權）條例》（特權法）傳召佢出席，拒絕出席就係犯法，莫非佢又想好似參與佔領行動咁「等拉」？
卓妮