中環出更：為大佛潔淨 蒙德揚傾成年
早前浴佛節，大眾藉住沐浴佛身來洗滌心靈，尋日就輪到天壇大佛嘅基座及台階洗白白。大嶼山天壇大佛於九三年落成至今，尋日首次由一間德國清潔公司進行大規模義務清潔行動。負責聯絡洽談及磋商嘅信興集團主席兼行政總裁蒙德揚（David）透露，呢類大型建築進行清潔通常都要經過好多程序及準備，因此即使係義務公益，搵地方時都食過唔少「檸檬」，而天壇大佛就足足傾咗成年先至成事！
諗過洗水塘 慘食檸檬
其實呢間德國清潔公司喺過去三十年，已經到過世界各地九十個不同著名旅遊景點進行清洗工程，包括東京日本橋、紐約自由神像、倫敦摩天倫等，又曾於清潔南韓忠州水壩期間用高壓水槍洗咗隻老虎圖案出來，令清潔工程頓時變得好有趣味。原來David最初都有諗過洗水塘牆身嘅污漬，於是嘗試接觸大潭水塘，但一直未有回覆，後來寶蓮禪寺答應，於是就開展今次洗白白大行動喇。
高壓熱水 冇化學成分
至於清潔過程係使用熱水高壓清洗機，冇化學成分所以天然環保。由於寺方唔想成個景點關閉咁長時間，所以安排分開唔同部分清潔，預計要清潔十日。
不過，天壇大佛今次唔使洗身，事關個佛像係銅製，時間耐咗會長出銅氯等物質，有助保護其表面，洗走咗反而冇咁襟擺喎，所以好多日本過百年以上嘅佛像都係成個青綠色。
寶蓮禪寺方丈釋智慧法師尋日亦有現身，但可能佢身體唔係咁好，揸住支高壓水槍擺完個靚甫士影相，試用咗兩下後好快就離開咗喇。反而跑開馬拉松嘅David就一口氣行咗三百幾級樓梯上去幫手都冇喘氣，認真厲害。
卓妮