三歲細路仔都知，預防勝於治療嘅道理。呢，南韓爆發新沙士疫潮，全世界嚴陣以待，偏偏港府闊佬懶理，任由南韓患者破門而入。「東方報業民意調查」顯示，大部分受訪者批評港府檢疫兒戲，要求當局盡快對南韓發出旅遊警示，確保市民健康，官老爺收到未呀！
話口未完，尋日又有兩名去完首爾嘅港人因為發燒而被送院檢疫，搞到人心惶惶。大家有眼見，南韓新沙士疫情瀕臨失控，係中東地區以外最多感染個案嘅國家，連台灣都提升首爾旅遊疫情建議至第二級警示，港府居然以世衞未對南韓發出旅遊限制為由，至今依然未發出旅警，咁同開門揖疫有乜分別吖？正因為港府唔嗲唔吊，搞到退團、轉團爭議不斷，唔衰攞嚟衰。「東方報業民意調查」顯示，五成受訪者要求港府提高南韓旅遊警戒級別；兩成九表示會暫停到南韓旅遊。咁即係點？即係政府冇承擔，市民只能自我防疫囉。
都話見過鬼怕黑，香港曾經歷過沙士慘痛一役，付出近三百條人命代價，照道理港府應該吸取教訓喇，點不知防疫繼續漏洞百出。好似前排有南韓男子入境本港時發燒咳嗽，亦被機場檢疫人員截獲，最終竟然輕易放行，任其播毒。最荒謬嘅係，港府明知病毒有潛伏期，仲一味要求有發燒嘅旅客先至申報，連立法會議員都忍唔住批評港府反智。民調亦顯示，三成七受訪者直指本港檢疫兒戲，敷衍了事；兩成五批評出現低級錯誤及漏洞；另兩成五直斥漏招，檢疫如同虛設。
香港至今未有感染個案，全靠時運高咋。面對全城鬧爆，當局終於知衰，近日提升戒備級別，凡南韓來港航機必須集中停泊喺遠方停機區，再以巴士接載到指定停機坪，並新增體溫檢測站為入境旅客量度體溫，如有發燒個案，即時送往瑪嘉烈醫院傳染病中心隔離。不過呢啲都係被動措施，效果有待觀察，講到底，人命關天，防疫措施梗係寧緊勿鬆，當局幾時先發旅警吖。
話時話，南韓疫情愈演愈烈，患者同死亡個案與日俱增，當地政府迫於壓力，終於公開當地首名患者入住嘅疫情源頭醫院，原來全南韓七成病例來自該院，情況有如本港○三年沙士威院８Ａ病房嘅翻版。最離譜嘅係，南韓政府對疫情遮遮掩掩，任由高危人士自由出境，自己衰都未算，仲隨時累埋街坊甚至鄰國。南韓首名康復者炮轟當地政府防疫措施落後半個世紀，真係一啲冇鬧錯。
一之為甚，豈可再乎！香港人對沙士記憶猶新，經唔起疫魔再度拍門，唔該港府醒醒定定，做好把關吖！