公民黨議員成立嘅新組織愈來愈多。繼該黨議員毛孟靜（阿毛）同新民主同盟范國威成立「香港本土」組織後，另一議員郭家麒尋日亦另起爐灶，聯同兩名時事評論員搞咗一個叫「蛋」嘅網站平台，郭更疑同本土派劃清界線，稱爭取內地民主與本土派冇直接關係。
本土派最近不斷質疑港人係咪要「建設民主中國」，相反「蛋」呢個新平台特別希望令年輕人認識同了解中國，從而推動內地民主。郭家麒承認，依家社會普遍注重爭取香港本身嘅民主，部分人更認為無能力爭取內地民主，但佢認為，部分年輕人唔理解內地對香港民主發展有重要影響，港人興趣亦唔大，佢會盡力去做。
當問及事前有冇通知主打本土議題嘅阿毛會成立新平台，郭家麒話事前冇知會對方，又稱爭取內地民主與本土派冇直接關係，加上自己關心內地民主發展多年，唔擔心被指係抗衡本土派。