政情：活化文物有功 黃永光榮膺博士
信和置業執行董事暨香港歷史文物保育建設有限公司董事黃永光（Daryl），近年積極推動活化香港文物歷史建築，當中包括將舊大澳警署活化成為大澳文物酒店，佢日前獲薩凡納藝術設計學院（香港）頒發榮譽博士學位，表揚佢喺推廣保育及活化歷史文物建築嘅工作。
Daryl認為，設計不只係美學，其實係代表對追求美好事物付出心思同創意，又話活化歷史文物項目，既可以保存歷史，亦可引領未來，希望可以鼓勵更多有才華嘅年輕人投身設計行業。
太太陪子讀書 無出席典禮
講番當日頒獎禮，Daryl單人現身，心情依然大靚，原來Daryl嘅大仔就讀嘅幼稚園快將考試，太太去咗陪囝囝讀書。對於就讀幼稚園就要考試會否太辛苦，Daryl話，自己當年都係讀呢間幼稚園，所以對學校好有信心喎。