政情：泛民知醜 向民陣說不
二○一七年特首普選方案表決倒數約十日，泛民廿多名議員早前先後三次聯署否決人大常委會「八‧三一」框架下政改方案，不過即使如此，據聞同泛民合作多時、由召集人陳倩瑩領導嘅民間人權陣線於上次同泛民代表開會時，竟然要求佢哋喺政改表決前夕，第四度聯署否決政改，聽聞泛民代表聽到呢個建議即刻火都嚟，認為咁做即係唔信佢哋，即場已經否決呢個建議。其實泛民第三次聯署否決時已被指係此地無銀，泛民今次好在無人哋建議做乜就做，否則實畀人話多此一舉。
宣傳「反袋住先」 無成效似被玩
自政改方案四月下旬出爐後，泛民不停落區宣傳「反袋住先」，包括落區搞街站派傳單，又搞巴士、汽車巡遊，甚至組成單車隊宣傳，但似乎宣傳成效一般，據聞呢啲行動都係民陣發起，泛民負責撐場，由於成效存疑，已令泛民中人頗有微言，直到尋日早上「真落區行動」，聽講唔少泛民成員私下怨聲四起，事關全港九新界分成多條路線發起遊行，傳媒關注程度又唔高，有人甚至認為民陣好似玩緊佢哋咁。
不過最令泛民議員震怒嘅，係民陣希望泛民廿七名議員喺政改表決當天，第四次聯署表明心迹否決政改方案，據知泛民議員對於上次聯署否決政改，被政界中人訕笑佢哋歃血為盟，歃到血貧，而且每綑綁聯署一次，就證明泛民愈唔團結。
反建議道具打「交叉」轉移焦點
再者泛民上次聯署前，公民黨湯家驊率先公開唱反調，表明唔會再參與綑綁聯署，據知其實其他泛民都有相同諗法，只係唔敢講出口，費時招人話柄，聽聞有人更提出反建議，指投票當日可於立法會外示威區設置一個大型仿議事廳坐位表嘅道具，到時每名泛民議員入場前喺自己個位打「交叉」，咁做法唔單止可以表達反對立場，更可以因利成便，趁機迫建制派表態敢唔敢於道具上「打剔」，變相將焦點放喺建制派身上。
話時話，依家距離表決進入倒數階段，究竟泛民陣營邊個係人邊個係鬼，好快揭盅，仲搞類似聯署嘅舉動，既無新意更顯得此地無銀，好彩泛民今次識得說不，否則認真輸人又輸陣。