政改方案即將進行表決，再有問責官員開腔呼籲各方支持政改踏出第一步。財經事務及庫務局局長陳家強尋日發表最新網誌，罕有地以股市論政改，直指再激烈選戰或政治角力也有回歸平淡時，激情過後就可能發現理想同現實好多時候有落差，強調依家係抉擇時刻，希望立法會能夠作出符合香港整體利益嘅選擇。
陳家強於一個月內第二次於網誌談及政改，今次最新網誌以「從概念回歸現實」為題，指股市暢旺時，會出現好多流於簡單同口號化嘅投資理念，投資者每每坐言起行入市，無掌握與所持有股票相關的資訊，佢其後筆風一轉，講到政治市場角力也有相似之處，每次選戰或出現重大爭議時，各政治力量以簡單易明嘅口號，搶佔道德高地，訴諸大眾嘅情感，以便動員並擴大支持。
本身學者出身嘅陳家強仲疑似將投資市場類比政改，指再火熱嘅板塊都有冷卻嘅一日，再激烈嘅選戰同政治角力都有回歸平淡嘅時候，激情過後，就可能發現理想同現實時有落差，希望社會冷靜思考現實，香港民主社會要進步，概念就「要落地」，究竟係咪可以真正「落地」，下周中自有分曉。
卓妮