中環出更：生B前趕功課 琪妙難忘
好多人踏入職場後都懷緬昔日嘅校園生活，尋日適逢香港大學於沙田馬場舉辦校友會挑戰盃，唔少港大校友聚首一堂，卓妮現場見到港大校友之一、維多利亞教育機構總校長孔美琪（Maggie），佢話當年喺港大讀教育碩士，係佢人生最難忘嘅一段時期，皆因佢喺該四年入面經歷晒結婚、度蜜月、生BB等人生大事。
Maggie對於當年嘅港大讀書點滴記憶猶新。佢話，當年讀碩士期間，經常要趕功課，頭兩年要趕及結婚同到夏威夷度蜜月前做完，其後佢懷孕臨盆在即，並於交功課限期前感到差不多作動，於是發力通宵完成八千字功課，並千叮萬囑老公記得幫佢寄番學校，最終順利分娩兼完成學業。
楊紫芝「目擊」金刀梁追女仔
同場仲有港大前女副校長楊紫芝，佢於港大任教多年桃李滿門，其學生包括港大校務委員會主席「金刀梁」梁智鴻及其太太、外號「放射科女王」嘅梁馮令儀、以及著名心臟科醫生謝德富等人，不過佢就冇教過現任港大醫學院院長梁卓偉，一齊教書就有喎。楊紫芝其後爆料，當年睇住金刀梁點樣追梁太返嚟，仲讚佢哋兩個都係幾乖嘅學生！
民政事務局前常任秘書長「媽打」李麗娟亦係港大校友，佢話雖畢業多年依然心繫母校，前排仲難得同班舊同學一齊為母校新校園籌款，未來亦會於校園內擺設本地雕塑家李展輝（Danny Lee）嘅金屬樹木裝置藝術雕塑，象徵十年樹木，百年樹人。
卓妮