前財爺唐英年有金句，話人生有兩樣嘢係避唔過嘅，一係死亡，一係交稅，其實佢講漏咗一樣，就係有毒食品嘞。呢，食品安全問題日日新鮮，根本防不勝防，呢頭有人踢爆有疑似膠米流入香港，嗰頭台灣又爆兩款茶葉農藥同殺蟲劑超標，其中一間更加喺香港有分店，分分鐘中咗招都冇人知。
話說最近網上瘋傳一段影片，有人喺飯煲拎出一團熟飯，並且不斷用手搓，冇耐就成為一團黏性極強、有如糯米嘅物體，片中人用水沖洗手中嘅物體，點知沖極都沖唔走。片中人仲話，呢團物體食落唔彈牙，懷疑有內地製造嘅膠米流入本港喎。係人都知，內地有毒食品多如牛毛，鎘大米、硫磺橘子、蘇丹紅蛋、孔雀石綠魚、三聚氰胺奶粉……五花八門，無奇不有，奸商對化學物質運用之嫺熟，絕對有資格問鼎諾貝爾化學獎，有人將內地列為頭號嫌犯，唔係冇道理o架。
查實膠米並唔係香港首先發現，早排有東南亞媒體報道，稱嚟自中國嘅塑膠假米流入印尼、印度及新加坡等地，其中印尼警方據報喺市面發現假米，初步化驗發現係由薯仔粉同人造樹脂製成，含聚氯乙烯，長期食用會引發腹部疼痛，甚至致癌。雖然報道言之鑿鑿，但中國商務部隨即反駁，話○八年之後冇再向印尼出口大米，到底邊個膠人整膠米，暫時仲係個謎。
咁又係呀，天下烏鴉一樣黑，天下奸商一般毒，佢哋唯利是圖，視人命如草芥，全世界都有呢啲奸商，不過中國奸商更多更無底線咁解啫。大家有眼見，喺製造有毒食品方面，台灣奸商不讓大陸同行專美，有台灣海參專賣店最近被踢爆以工業用化學品浸泡海參，據講居然係聽咗大陸人「教導」，至識得用呢種化工原料。唔怪得有人話兩岸未統一，無良商人已經先行一步，夾手夾腳毒害同胞。香港亦係一擔擔，早前流通兩岸三地嘅坑渠油，部分原料正係嚟自香港，問你死未。
點講都好喇，假冒偽劣食品無分地域，無論源頭喺邊，為禍一樣咁大，當局必須徹查到底，從嚴把關。不過講到把關咯喎，食安官僚表現認真失禮，次次後知後覺，回回賊過興兵，唔係傳媒揭發，就係外地示警，今次會唔會又搞到一鑊泡，真係冇人敢寫包單。對於膠米傳聞，海關話就話會調查，係咪講完就算，仲要睇過先知。
話時話，港產官僚成日畀人批評食塞米，計功夫茶話齋，食塞米最多變飯桶啫，食膠米咯喎，成個腦都係漿糊就弊喇！