政情：公民講場：街市「悶焗」似足政改

現時仲有唔少食環署舊街市冇裝冷氣，大熱天時室內氣溫試過高達三十九度，真係搵鬼幫襯。立法會一個委員會尋日討論有關問題時，工聯會議員王國興就批評有關加裝冷氣嘅門檻過高，要八成半街市檔戶同意先可以施工，仲高過通過政改所需嘅三分二多數門檻。假設有稍多於一成半檔戶好似班泛民議員咁，唔肯顧大局、順民意支持加裝冷氣，其他八成幾人就被迫同佢哋一齊綑綁「悶焗」，同香港依家嘅政改「悶局」都真係幾相似。