激進泛民近年多次於立法會發動拉布戰，連立法會實習生都關注議員拉布嘅情況，尋日當面問及立法會秘書長陳維安（Kenneth）等人，可否透過修改議事程序來避免拉布，Kenneth話，議事規則委員會已經開過幾次會，希望議員之間能夠達到共識。
立法會秘書處舉辦嘅專上學生實習計劃啟動活動，Kenneth同廿三名實習生講解立法會日常運作，佢透露，兩年前隨立法會到英國訪問，當時適逢當年嘅財政預算案嘅拉布戰落幕，兩地嘅立法機關就講起點樣應對拉布。
佢憶述，英國國會秘書處嘅職員當時話於十九世紀末，英國議會都出現類似拉布嘅情況，一個法案往往要花好長時間先處理到，而最有趣嘅地方係，當地主持會議嘅代表同立法會主席曾鈺成喺議會上講嘅嘢差唔多，莫非佢係暗示香港依家嘅情況落後，猶如二百幾年前嘅英國？