政情：仁愛堂大計 中樂治腦退化
慈善機構每年都要絞盡腦汁諗下有乜新搞作，仁愛堂尋日公布今年大計，打算試用中樂醫治腦退化症。仁愛堂主席史顏景蓮話，依家多數會用西藥醫腦退化症，治療費好貴，副作用又多，所以諗住試下呢種非藥物療法有冇效。
患者須不斷聽半年
據了解，呢種治療方法好似食西藥咁，患者要不斷聽中樂，一個禮拜聽三日，每日聽四次，每次聽十五至二十分鐘，療程為期半年，希望幫到患者提升認知能力同改善情緒。
史顏景蓮話，今次計劃喺七月開始試驗一年，期間會搵中大醫學院嘅研究人員評估成效；負責今次計劃嘅中醫顧問劉振寰話，中國古代一早記載「五音療疾」，主要理論係以中樂嘅五音「角、徵、宮、商、羽」，對應人體五臟「肝、心、脾、肺、腎」，用嚟調節人嘅「怒、喜、思、憂、恐」喎。