中環出更：劉業強「登基」 否認父垂簾聽政
新界鄉議局尋日舉行換屆選舉，八十年代開始出任鄉議局主席、外號「新界王」嘅劉皇發事先張揚退下火線，佢嘅大仔劉業強（Kenneth）喺無競爭情況下自動當選鄉議局主席，兩名副主席張學明、林偉強亦順利連任，三人任期直至二○一九年五月底為止。不過，Kenneth甫上任首日，外界已猜測發叔會否垂簾聽政，Kenneth重申父親唔會垂簾聽政，但承認以父親嘅經驗，任何人問佢意見都係適當。
發叔自言身體唔錯
Kenneth形容，香港依家正值多事之秋，新界人要和諧團結先可以抵禦衝擊，其後用英文回答傳媒問題時提到係自行交表格參選，否認「世襲」主席嘅講法。發叔尋日亦有現身以行動力撐Kenneth，又話鄉議局會仍為鄉民謀福祉，自己愛鄉、愛民之心亦不會改變。
傳言發叔嘅健康情況大不如前，發叔開腔闢謠，自言身體唔錯，但現場所見步履有啲不穩，全程要由張學明同林偉強二人傍實，張學明強調對方精神狀態同思維冇問題。
卓妮