立法會議員獲邀喺周日上深圳見京官討論政改，共有五十六名議員報名出席，當中包括民協馮檢基（阿基）在內嘅十五名泛民主派議員。阿基尋日話到時會要求「凍結」政改，因為依家唔止泛民同中央互不信任，香港市民對內地亦互不信任，加上香港同內地對「一國兩制、高度自治」有不同認知，如果再處理政改只係綁多個死結，不如花兩、三年時間解決咗「互信」同「一國兩制」呢兩個問題，先再處理政改喎。簡單啲講，阿基嘅建議即係要政改「原地踏步」。
