政情：郭偉強夫妻檔落區家訪
立法會勞工界議員郭偉強結婚已有三個多月，可以話係過咗試用期，但似乎唔係咁多人知佢結咗婚，有街坊仲介紹女仔畀佢識添。郭偉強當然急急澄清已經結咗婚啦，仲帶埋太太落區家訪見街坊。佢話，通常九點半鐘完咗家訪先有飯食，原本想叫太太自己食先，但太太就寧願陪佢一齊家訪後再撐枱腳，認真恩愛。郭偉強話，多謝太太陪佢家訪，令佢同街坊之間又多個話題。
計劃生育 一個起兩個止
話說家訪期間，唔少公公婆婆見到郭太都好開心，仲叫佢哋快啲生小朋友添！郭偉強計計數，自己已卅七歲，年紀都唔細，又好鍾意小朋友，覺得都係時候要生育，雖然生仔生女無所謂，但仍覺得生女好似孝順啲。
好多人擔心生個小朋友要使幾百萬，郭偉強就無有怕，話父母都係「粗生粗養」佢，佢都可以繼續「粗生粗養」下一代。不過，就算生都係一個起兩個止，因平極都有成本喎。