政情：社福界雙張 「犧牲」懷仔
工聯會（工記）立法會議員陳婉嫻（嫻姐）協助匿藏香港九年嘅無證男童懷仔到入境事務處自首，並為懷仔爭取居港權及就學機會，引起全城爭議。呢件事更加由本土資源之爭，牽涉至人道問題。不過，講到人道社福問題，向來係泛民主派政黨嘅拿手項目，但眼見近日無論泛民、建制以至嫻姐所屬嘅工記都袖手旁觀，無論對懷仔或嫻姐都「見死不救」，原來都係政治立場累事。
區選臨近 驚本土派狙擊
其實無證兒童逾期居港一啲都唔罕見，無論建制、泛民都一直有社福界人士幫助呢類「小人蛇」個案，只係普遍都會低調進行，私底下會先向入境事務處等政府部門「叩門」，傾唔掂數先考慮公開個案，利用輿論向政府施壓。好似嫻姐咁一開波就大鑼大鼓公告天下，有社福界人士就質疑嫻姐除非想攞威，先會有此舉動。社福界議員張國柱日前亦都話，呢啲個案每日都有，只係冇人知。嫻姐行走政界多年，冇理由唔略知一二。
至於點解今次冇政黨夠膽「認頭」，建制方面除咗考慮到區議會選舉臨近，風頭火勢仍然捲入極具爭議嘅中港問題無疑係「自殺式襲擊」；而泛民除咗考慮到目前係「對家」有難，無謂多事之外，亦考慮到本土派正不斷向泛民票倉鎅票，出少句聲無謂被本土派多個話柄亦可以理解。
港已簽《公民權利公約》
不過，無論建制或泛民，都有資深社工指出，雖然冇處理過父母均非港人、非法入境及不在港出生嘅「三非」個案，但首先要畀懷仔返學，因為香港已簽署《公民權利及政治權利國際公約》，懷仔有就學權利。不過，假如懷仔呢單案係經泛民議員張超雄或張國柱處理，社會又會唔會有咁大反響呢？最低限度從事社福嘅張超雄同張國柱都應該出句聲吖。歸根究柢，一切都係議題政治化嘅後果，連人道問題都要「歸邊」。