中環出更：創業置富切忌人云亦云
唔少青年人畢業後都想一嘗創業滋味，但盲摸摸好易撞板收場。城市青年商會尋日舉辦第八屆影子企業家開幕典禮，邀請咗幾位有過唔同經歷嘅企業家以過來人身份分享自身體會。鴻福堂總經理兼執董司徒永富就教路，創業最忌人云亦云，見到人哋做得好就盲目跟隨，既唔係最先嗰個又唔能夠突圍而出，只會失敗收場。
講起創業之路，曾經從事金融業嘅司徒永富自爆當年過度投資，貪勝不知輸，結果損手而回兼失業，日日戴住條呔扮返工，最終有朋友搵佢一齊賣涼茶，佢焗住應承做住先，而佢太太當時亦唔敢同人講佢係賣涼茶，只係形容丈夫做健康產品生意。對於想創業嘅年輕人，佢就畀咗幾個貼士，就係唔好用阿媽辛苦錢創業，要好好善用政府資助，同時要愛上自己嘅產品，但切記唔好同股份談戀愛喎。
時景恒籲了解市場需求
時昌迷你倉創辦人時景恒創業之路亦不平坦，曾經試過被員工集體「穿櫃桶底」偷錢，早兩年又試過搞上市觸礁而損失一千多萬元。佢話年輕人創業好多時會有競爭對手，除了要諗方法突出自己外，仲要了解市場需求，好似現時香港住屋單位面積細，市民對迷你倉需求大，因此即使本地有七十多間公司經營迷你倉業務，仍能為市場所容納，生意相對穩定。
香港青年協會督導主任鄧良順則認為，想創業嘅學生不妨先去有興趣嘅行業內打幾年工，拓展相關人脈網絡，吸取更多經驗，就冇咁易失敗。城市青年商會會長楊振強指，現時接受學生報名參加創意創業比賽，優勝者可與一班商界名人於飯局交流心得或尋找合作機會。
卓妮