狗主拆招 貼隔音板除門鐘
【本報訊】面對房屋署嚴打，公屋狗主有不同方法應對，最多人採用的招數是在大門貼隔音板，防止傳出狗吠聲，有公屋狗主苦笑道：「貼到間屋似band房！」亦有人索性拆走門鐘，無人在家則掛起電話，以免引起狗吠。
公屋狗主在facebook群組共商對策，分享應對房署巡查的方法。他們每當遇到房署巡查，隨即在群組通風報信，呼籲其他狗主防範。從留言所見，房署捉狗隊幾乎走遍各屋邨，令狗主防不勝防。不少狗主不敢再帶狗出街，紛紛抱怨人狗都抑鬱。
有公屋狗主憶述遇上捉狗隊時情況：「隔住鐵閘，問我有無養狗，我拎隻狗公仔問佢係唔係呢隻。佢叫我畀佢入屋睇，我話得我一個女仔，你捉我去後巷點算？佢話佢係管理員有權入屋，又話有人話我屋企成日有狗吠聲。」
亦有狗主在網上查詢：「其實如果有人拍門，係咪唔應門，扮無人喺屋企，佢見唔到狗就得？如果淨係聽到有狗吠聲怕唔怕？」有網民回應建議狗主致電政府熱線1823，反投訴房署擾民。