尋日係佛誕，亦係一年一度嘅太平清醮，可惜吖，天公不作美，遊客較往年為少，連場暴雨更搞到包山蓉蓉爛爛，仲發晒霉添。計功夫茶話齋，平安包發霉事小，都市炸彈遍地開花事大，落幾日雨就搞到塌樹塌棚架，市民唔驚就假。
最近幾乎日日傾盆大雨，雷聲隆隆，天文台仲試過一日內發出「四黃一紅」暴雨警告添。話口未完，屯門市中心輕鐵站一棵大樹因為大雨導致倒塌，壓住輕鐵來回線電纜，令服務受阻，好彩事發當日係星期日，市民唔使返工返學，否則影響就大咯。
塌樹事故又點止咁少吖，葵涌、牛池灣、淺水灣道、跑馬地、摩星嶺、火炭等地，都有塌樹壓毀車輛嘅意外，好彩冇搞出人命咋。仲有吖，荃灣眾安街一幅大廈外牆棚架受天雨影響突然倒塌，一輛行駛中嘅輕型貨車中頭獎；至於航班延誤及取消更係不計其數，乘客被迫滯留機場，認真無奈。
大家有眼見，香港話就話係國際大都會，實際上好似豆腐渣咁不堪一擊，連日暴雨就搞到全城大混亂，危機四伏，其中塌樹最得人驚。自從幾年前港大女生喺赤柱被大樹壓死，同類意外就未停過，去年先至有一名孕婦慘遭同一命運，一屍兩命。當局最初係威係勢成立樹木辦，結果多年過去，一事無成。第樣唔講，齋講保護古樹名木，當局係就係推出名冊，弊在之後闊佬懶理，如同虛設，上個月之嘛，西區般咸道先至有一棵古樹倒塌，調查發現原來一早病入膏肓，官老爺有眼不識病樹，簡直靠害。
呢啲只係當局混帳事件嘅冰山一角咋，例如山泥傾瀉咁吖，係人都知可大可小，偏偏港產官僚話之你，去年多條遠足徑因為暴雨引致山泥傾瀉，漁護署聲稱暫時關閉，結果既冇豎立圍欄，又冇警告標誌。嗱，呢幾日又紅雨又黃雨，遠足徑肯定危機四伏，唔好畀功夫茶批中，當局一樣係關人個關嘅咋。咁仲唔止，危險招牌搖搖欲墜，跌完一個又一個，市民講到口水都乾，要求屋宇署加快取締違例招牌，偏偏署方賴天賴地賴人手不足，總之藉口多多，市民安全邊有保障吖。
好明顯嘞，香港之所以危機處處，一步一驚心，根本係港產官僚懶懶閒，完全冇吸取教訓所致，難聽啲講句，咁樣同草菅人命冇乜分別。俗語話，防火防盜防小人，計功夫茶話齋，官老爺冇心冇肺，市民點防都防唔到梗有一個喺左近嘅都市炸彈。咪話唔提醒，未來幾日嘅天氣依然唔穩定，就係老天爺對港府管治能力嘅考驗，為人為己，唔該官老爺做嘢喇。