政情：張永霖自爆 介紹王征畀亞視股東
港府早前決定不向陷入財困嘅亞視續牌，令呢間有幾十年歷史嘅電視台壽終正寢，最遲明年四月關門大吉。亞視最近連午間新聞都取消埋，又不時傳出提早結業嘅消息，令亞視員工士氣跌至新低。亞視淪落到今時今日呢個田地，但「搞死」亞視嘅主要投資者王征，始終未現過身解畫。原來王征當初加入亞視，竟然同亞視前執行主席張永霖有關。
離開亞視後穿針引線
王征當年以內地商人身份入主亞視，眾所周知係因為佢識亞視股東查懋聲，但到底王征點解識到查懋聲呢位紅色商人，最近終於揭盅。我哋早前喺馬場撞到做過亞視執行主席嘅張永霖，梗係要捉住佢問吓點睇亞視啦，點知張永霖突然自爆，當年佢辭職唔撈亞視後，就介紹咗王征畀查懋聲認識。
事隔幾年，王征「搞死」亞視，咁到底張永霖算唔算係間接害咗亞視呢？張永霖聽到後無答到問題，只係哈哈大笑幾聲，似乎呢個笑聲已經畀咗答案。不過，一雞死一雞鳴，現時已有唔少財團有意加入免費電視戰場，咁快下定論早咗少少嘅。