政情：教協傳擱置組黨
隨着中央早前承諾香港最快可以喺二○一七年同二○二○年普選特首同立法會，本港多個一向有派人參選嘅非政黨組織，都有在明在暗咁研究政黨化。其中鄉議局就曾經實牙實齒話要籌組新界黨，仲成立咗個專責委員會籌劃調研，但最後都係虎頭蛇尾，冇晒蹤影。另一個長期參政組織香港教育專業人員協會（教協），喺上屆立法會選舉前後都講過要研究組黨，但據悉最近經已擱置討論。教協放棄組黨，表面理由係話普選立法會無期，但據聞真正原因係教協內嘅溫和派同激進派分化日益嚴重，如果強行組黨，隨時會一分為二鬧雙胞！
教協喺七十年代成立時主打教育議題，較少直接涉足政治，直至前立法局喺八五年引入教育界功能組別議席，教協先至首次派人參選。之後港同盟及民主黨（白鴿黨）先後成立，教協前後兩任會長兼兩位教育界立法會議員司徒華及張文光，都係身兼該黨嘅創黨成員，令教協同白鴿黨結下不解之緣。到上屆立法會選舉前夕，原定承接華叔同張文光參選教育界議員嘅現任教協會長馮偉華，亦喺選舉前加入咗白鴿黨。豈料其後馮偉華突然驗出身患頑症，改由無黨籍嘅教協原總幹事葉建源參選，先至斬斷咗教協立法會代表同時係白鴿黨黨員嘅歷史。
稱功能組別仍在礙部署
其實教協早喺由張文光主政過渡到馮偉華坐正期間，內部已積極研究政黨化，目標係於立法會落實全面普選、教育界功能組別完成歷史任務後，以新政黨名義喺各區參選，希望憑藉教協喺全港九新界合共有近九萬名會員嘅優勢，成為一股獨立於白鴿黨嘅政治新勢力。不過，有教協中人近日表示，隨着人大常委會作出「八•三一」決定，二○一七特首普選承諾隨時落空，立法會全面普選遙遙無期，教育界功能組別喺可見將來都會繼續存在，教協嘅組黨大計經已正式擱置。
韓連山馮偉華 未佔已亂
有熟悉教協情況嘅人士分析，早喺佔領行動爆發前，教協溫和派同激進派之間嘅分化同內鬥已日益白熱化。以韓連山為首嘅激進派成立嘅「進步教師聯盟」，喺去年初大舉派人參選教協理事會，成功喺張文光同馮偉華為首嘅溫和主流派手中奪取一定席位，令溫和派喺往後嘅「雙學」罷課同佔領行動中被迫愈走愈激，兩派就不同嘅教育同政治議題亦不時出現爭拗。如果教協喺呢個時候組黨，究竟應該走溫和定係激進、走「大中華」定係「本土派」路線，肯定又會拗餐飽，甚至最後會正式分裂，一搞就搞咗兩個教師黨出嚟，咁就不如暫時唔搞好過。