香港成日自稱係乜乜中心乜乜天堂，其實根本係吹水唔抹嘴，香港已淪為難民天堂就真，而且仲係假難民嗰隻。
呢，日前警方聯同入境處破獲一個由孟加拉漢搭港女夫妻檔組成嘅人蛇集團，拘捕主腦、骨幹成員、黑工及僱主共十四名男女。呢個人蛇集團提供「一條龍」服務，過去半年已偷運二百名南亞裔人蛇來港當黑工，每名人蛇收取數千至數萬元，山大斬埋有柴，半年收益逾一百三十萬元，都咪話唔和味。
話時話，呢單個案只係冰山一角咋。港府中門大開，吸引愈來愈多南亞及非洲裔人士來港搵食，佢哋利用聲請制度嘅漏洞，一抵埗就聲稱受到迫害而申請免遣返，當獲發「行街紙」後，就可以堂而皇之留喺香港，做黑工嘅有之，作奸犯科嘅有之，搞到香港烏煙瘴氣，直情好似難民港咁。
截至舊年十一月，入境處累積九千六百宗聲請個案未審理，由於審理程序複雜，平均一單個案需時二點七年，導致愈來愈多「難民」滯港。其實係人都知，呢批人蛇絕大多數係假難民，舊年至今只有一人獲確認係真正難民，其餘全部係博懵來港淘金。正如有立法會議員話齋，扮難民嘅黑工擺明搵香港笨，佢哋濫用機制，睇準制度漏洞，一來到香港就舉手，有人甚至未到港已搵定律師辦理聲請手續。
最離譜係，呢班假難民一面做黑工搵食，一面又可以獲得港府提供各種津貼及援助，正式係又食又拎。淨係上個財政年度咋，港府呢方面嘅開支就高達二億四千六百萬元，小數怕長計，咁多年來究竟使咗幾多錢，睇怕都幾襟計，納稅人簡直冤哉枉也。
浪費公帑仲係其次，假難民帶來嚴重社會及治安問題先至係大件事，例如重慶大廈咁吖，簡直黃賭毒黑樣樣齊，而中環蘭桂坊更加淪為「人間妖域」，各種罪案無日無之。
講來講去，都係港府假慈悲埋下嘅禍根。今時今日歐美國家紛紛收緊難民政策，泰國等東南亞國家甚至拒絕難民船靠岸添，唯獨港府大開中門，來者不拒，香港有乜法子唔淪為難民港吖。正所謂，前車之覆，後車之鑑，當年越南船民搞到雞毛鴨血，港府唔識吸取教訓，明知聲請制度被人濫用都唔諗辦法改善，你話係咪愚不可及吖。
老實講，香港問題多多，港府自顧不暇，依家仲要照顧埋假難民，想唔七國咁亂都幾難。呢，近年大批非洲人士聚集廣州，搞到頻頻出事，甚至爆發騷亂，香港再唔堵塞漏洞，遲早都係咁嘅咋！