香港社會，都唔知點解變得咁不可理喻，好似同文話齋，連公屋都成為炫耀本錢，所以話世事無絕對，只有真情趣！以前住公屋被視為基層，需要政府多加關照，家陣竟可以用來「驕其女友」──我唔加你個名，幾咁豪情自我，霸氣凌雲！
回歸正題，香港成個社會變得不可理喻，更明顯嘅就係爭拗不絕嘅政改方案，非藍即黃，永遠容不下和平理性，好似「溫和泛民」，一發聲──就要受到萬箭穿心！政改去到呢一步，是否「袋住先」，未到立法會投票一刻，冇人夠膽話一定唔得！
之不過，在政改問題上，多聽一些溫和理性嘅聲音，又有乜唔好呢？像「肝臟權威」盧寵茂以病情比喻政治情況，佢話人體內嘅白血球含量，冇一個國際標準，就好似普選一樣冇國際標準，若然政制原地踏步，就好似一個病人唔睇醫生等死，是以佢希望政改通過「袋住先」，等香港可以「醫住先」！盧醫生之論，同老朽早前所說的「政改如人骨髓」唔多唔少有些少相同之處，老朽話：政改亦如人的骨髓一樣，需要不斷造出新鮮嘅血液，才能讓生命不斷前行，香港二○一七如果唔得，那麼民主的白血病時代就來臨了！
近日溫和泛民黃成智亦因就政改「袋住先」立場同個別白鴿黨友反晒面，政圈更一直傳佢「收人錢做嘢」，是耶非耶，留番王俞去「解碼」好了！老朽但知每個人的生命歷程，所扮演的角色有時身不由己，有時又係純粹嘅偶然，一如美國詩人弗洛斯特呢幾行詩句：「雙岔道自黃樹林中分出，遺憾我不能同時走兩條路，我選擇人迹較少的一條，自此面對截然不同的前途。」黃成智「一人一信」有條件撐政改行動，會走出一條甚麼路，前途如何暫難定論，然而自闖新路不隨波逐流嘅精神，還是值得肯定的。