政情：公民廣場：送「達」2100萬 股民要「錢」填數

在高鐵工程延誤事件中被指判斷力欠佳嘅港鐵前行政總裁韋達誠，被揭臨走時獲發逾二千一百萬元「分手費」，令公眾及一眾港鐵小股民嘩然。港鐵尋日舉行股東大會，多名小股民都就此表達不滿，有人更當面要求港鐵主席錢果豐及其他董事，將佢哋嘅薪金全部捐出嚟「填數」，因為搵個咁嘅人入港鐵做嘢，領導層責無旁貸，呢個要求贏得全場如雷掌聲，令即將夠鐘卸任嘅錢果豐冇晒面。