政情：蛇齋餅糉 英實習政客驚訝
泛民主派立法會議員經常被指勾結外國勢力，話口未完，尋日我哋就喺立法會見到有一名神秘外籍人士跟住會計界議員梁繼昌（Kenneth）出出入入，細問之下原來係佢新請嘅實習生Benedict Maguire。
Benedict係英國自由民主黨黨員，打算喺二○二○年參選國會議員。講開選舉拉票，佢話英國通常都係搞籌款活動，好少會派禮物拉票，當佢聽到香港有蛇齋餅糉呢樣嘢時，就表現得好驚訝。
在港三日 無緣見識
其實Benedict喺香港嘅實習生涯只有三日，尋日第一日返工就去到立法會四處參觀，觀摩吓香港立法機關運作，之後就會轉去澳洲實習。聽講Benedict嚟香港主要做辦公室工作，亦會睇吓同事嘅英文文法有冇錯，加上英國同香港嘅議會運作有啲相似，所以大家都會交換吓諗法。至於香港選舉中出現蛇齋餅糉嘅情況，佢話英國唔係完全冇，但就唔會咁明顯，可惜佢喺香港時間好短，否則可以見識吓喇。