泛民主派立法會議員於去年佔領行動期間喺立法會展開「拉布」等不合作運動，勢要阻礙議會運作，迫使政府就政改讓步。不過，所謂嘅不合作運動近期似乎已經有玩完迹象，被泛民操控嘅工務小組委員會尋日火速審議政府撥款申請，小組委員會主席梁家傑（袋巾傑）更主動提出延長會議，等議程可以如期通過。唔通泛民終於覺悟，明白不合作運動阻礙民生發展會犯眾憎，擔心選票流失？
工務小組尋日開會審議六項政府工務工程撥款申請，包括興建西九龍政府合署、喺西九龍填海區重置食物環境衞生署辦事處同車房、屯門西北供水計劃，以及沙田廢物轉運站翻新及提升工程等，泛民唔止冇「拉布」，仲迅速通過多項撥款申請，袋巾傑更主動提出延長會議十五分鐘，等議程上嘅所有議程均可以如期完成審議。結果尋日約兩小時會議，就通過咗合共六項撥款申請。
其實除咗工務小組外，泛民喺財務委員會亦疑似停止「拉布」。好似上周五審議入境事務處就研發新一代智能身份證提出嘅撥款申請，本來預咗泛民「拉布」，所以安排兩節合共兩小時會議。點知泛民出奇地冇「拉布」，結果唔使一節會議已經通過咗撥款申請，大家提早收工。