政情：政改表決擇日大迷信
立法會將於下月表決政改方案，但實際表決日就一直未有定案，近日立法會議員就猜測邊日會表決，仲掀起一陣大迷信之風，話最好喺六月二十四日表決政改喎。我哋就問過三大玄學及風水專家，除咗本港富豪御用堪輿學家蔡伯勵早前講過六月二十四日係吉日外，堪輿學家麥玲玲與李丞責亦一致認同二十四日係吉日，有利通過政改方案，並指傳聞會表決嘅六月十七日反而諸事不宜。
三玄學家意見接近
其實成個六月入面嘅好日唔多，麥玲玲話，六月十七及十八日連續兩日都係「凶日」。十七日（農曆五月初二）乃甲子日，除與特首生肖相沖外，通勝更指該日「餘事勿取」，加上當日係「月破日」，個日子真係「唔係幾得」。相反，六月二十四日（農曆五月初九）則係吉日，宜做事情包括嫁娶、祭祀、祈福、開光、修造、入宅、移徙、動土、交易等等，理論上喺呢日做大決定會較易成功。
李丞責分析，六月十七日「月破日」代表很大機會得唔到同輩支持，容易出現異見或滋事份子。而十八日則是「歲破日」，意思將得不到長輩支持，對投票未必有利。佢仲話，一年之計在於春，揀日子着重開頭，如果個頭開得唔好，翌日就算係好日都彌補唔番，更何況係凶日，所以如果「一定要得」嘅話，就最好唔好揀呢兩日喇。
李師傅又話，政改係正面嘅嘢，最終目的都係想國泰民安，所以若從玄學角度睇，喺適宜結婚和合等日子進行係最好不過。加上六月二十四日翌日（即二十五日，農曆五月初十）係「滿日」，有圓滿及豐盛意思，連帶二十六日都係順利日子。
議員聞政府揀凶日
尋日我哋見到立法會紡織及製衣界議員鍾國斌，佢話撰寫通勝嘅蔡伯勵都話六月二十四日係吉日，若政改能於好日通過，市民就有好日子過！不過，法律界議員郭榮鏗就話聽聞政府希望於暑假休會前的六月十七日表決，唔通政府偏唔信邪，係要揀一個「凶日」表決？雖然話玄學嘅嘢「信則有，不信則無」，但政改一波三折，相信揀個好日子表決會令信心都大啲。