中環出更：梁美芬派書籤游說 泛民挑機
為撐政改可以去到幾盡？建制派立法會議員梁美芬近日印製咗一萬張「齊來鬆綁」書籤，仲深入泛民主派陣地派發，游說泛民議員齊齊「鬆綁」，支持政改方案。點知梁美芬一片熱心卻被泛民大潑冷水，質疑佢點解派宣傳品可以派到去泛民辦公室，甚至話要收集番晒啲書籤畀返佢添。泛民議員經常鬧政府唔聽意見，原來佢哋都包容唔到異見聲音，真係自打嘴巴。
話說梁美芬尋日趁立法會開會向議員派發「齊來鬆綁」書籤，當派畀泛民議員劉慧卿時，就被卿姐質疑點解會派到去該黨嘅九樓辦公室︰「我班同事問點解可以上九樓派，我問緊副秘書長得唔得。」卿姐之後仲將書籤交畀立法會保安員。
Q版肖像由小粉絲操刀
與梁美芬同屬九龍西選區嘅議員黃毓民就挑機，聲言要製作一萬張反「袋住先」書籤，同梁美芬一齊落區派。梁美芬聽到就話︰「等我用鉸剪剪咗佢！」另有人就質疑梁美芬書籤上嘅Q版肖像較真人年輕，梁美芬就話因為係小粉絲○八年時幫佢畫嘅，所以同依家有啲唔同樣喎。
