大家去街市買餸，有冇注意到愛講笑話嘅「豬肉佬」都有番咁上下年紀？冇錯嘞，家陣香港鬧人才荒，連「豬肉佬」都後繼無人，尋日先有一班業界人士要求港府增撥資源，開辦鮮肉刀手培訓課程，培養新血喎。
講真，家陣香港各行各業都缺人，「豬肉佬」人手不足只係冰山一角咋。早前IT界先至呻到樹葉都落，猛話請唔到人，事關本地應徵者質素參差，根本請唔落手。仲有呀，飲食業一樣牙痛咁聲，由廚房到樓面，由洗碗到清潔，通通人手不足，有老闆索性提早收工，有老闆甚至忍痛結業，你話本港人才荒幾咁嚴峻吖。
呢，話口未完，又輪到公院專科醫生流失嚴重，醫管局破天荒大幅增加駐院專科醫生嘅培訓名額。係咁嘅，醫管局即將招聘四百三十一名專科培訓醫生，較上年度大增三成八，創近三年來新高，名額以內科為主，其次係外科、急症科、麻醉科同骨科，以吸納兩間大學醫學院畢業生為主。
話時話，公院前線人手短缺早就唔係新聞，只要睇吓輪候人龍就知喇，家陣睇急症，等十幾個鐘濕濕碎，急症室淪為「慢症室」。專科服務情況更加誇張，閒閒哋排期數以年計。好似骨科專科門診咁，九龍東新症要輪候一百六十七個星期，新界東亦要排一百四十個星期，隨時小病拖成大病，問你怕未。
搞成咁，咪就係醫管局多年來管理不善囉，資源分配不公，一味肥上瘦下，醫護人員意興闌珊，加上私家醫院重金挖角，專科醫生唔流失至奇。正如有醫院高層話齋，十個煲得七個蓋，家陣先嚟增加人手，始終追唔番以前嘅流失率。再講吖，隨着社會人口老化，醫療需求有增無減，培訓名額始終有限，連杯水車薪都談唔上。
係人都知，培訓一名專科醫生唔可以一蹴而就，冇番十幾年時間，根本唔使旨意，何況專科醫生臨床經驗非常重要，資深醫生不斷流失，新人被迫頂硬上，揠苗助長嘅結果，只會事倍功半、弄巧成拙嘅咋。
講起就心噏咯，以前香港醫療水平傲視全亞洲，家陣就醫療事故不絕如縷，早就被周邊地區後來居上。呢，菲律賓人質事件傷者易小玲，在港歷經三十三次下顎整形手術都失敗，轉去台灣做手術一次就成功，你話係咪羞家吖。
都係嗰句啦，香港近年惡運纏身，社會一味沉迷政治爭拗，加上港府冇人口政策，又唔重視培訓人才，梧桐樹都冇棵，仲點吸引鳳凰來吖！再咁落去，香港百業俱廢，唔好話發展高科技冇人才，想買斤肉可能都搵唔到地方吖。