激進立法會議員除了大吵大鬧，更是拉布拉上癮；預算案撥款再受拉布戰困擾，鬍鬚曾原想「不管風吹浪打，勝似閒庭信步」咁款歎吓咖啡，睇吓法國電影都唔得，連忙趕着寫網誌透露：基於本月中未能通過預算案撥款，影響政府六月份開支，決定率先向醫管局、八大資助院校及立法會行政管理委員會暫停下月撥款……
香港社會已永無寧日，打着「爭取民主」、表面為「下一代着想」嘅人士，根本無視「民主制度是為了讓不同的人發出聲音」，任何場合，只有佢哋叫囂，從不懂得理性包容，擺出一副「徒有滿腔熱血，終究報國無門」嘅嘴臉，而內心其實只認為一個吵吵鬧鬧、爭拗不斷嘅社會，才是一個健康、正常發育嘅社會！阿哥，如此心態，香港未來如何會有明天？若然又係叫囂話有，肯定係空肚子打飽嗝──裝飽！
激進派議員拉布成癮，搞到鬍鬚曾心情大受影響，於是借網誌抒懷，當然，亦可以話佢乘機發炮，借八十年代初電視劇《飛越十八層》主題曲《難為正邪定分界》嘅歌詞：「努力興建，盡情破壞，彼此也在捱」。
鬍鬚曾暗指政府同事「努力興建」，而有議員就如似劇中魔鬼咁借拉布「盡情破壞」，搞到拖延大量撥款，嚴重影響民生，令到市民大眾彼此也在捱！
市民在捱，議員高官們肯定唔使捱！政府冇錯係努力興建，之不過包括高鐵在內嘅三條鐵路不斷延誤同超支，仲分分鐘淪為大白象工程，而真正「重中之重」要興建嘅公屋卻一再政策失誤，目前公屋輪候冊申請宗數已接近二十八萬！政府努力大搞大白象工程，真正十萬火急嘅居住問題卻攞唔出絲毫辦法！鬍鬚曾有口話人，歎完咖啡有冇諗吓己過？一味演棟篤笑狂抽水，你就真係捱得過癮嘞！