政情：黃靜文波友係舊老細丈夫

理工大學尋日有個林大輝廣場命名儀式，好多政商界人士都有出席。大輝代表嘅廠商會都拉隊捧場，包括副會長陳淑玲、吳永嘉及行政總裁黃靜文（Adeline）等，其中Adeline仲同前上司、食物及衞生局常任秘書長謝凌潔貞（Cherry）喜相逢。Adeline見到Cherry就叫聲「舊老細」，Cherry就更正話係「同事」啫，認真搞笑。

與謝凌潔貞喜相逢

Adeline月底就離任行政總裁，佢話未諗去向，都係打高爾夫球過日神喎。講講吓，原來Cherry老公係Adeline嘅波友，唔怪得兩人咁熟。咁啱得咁蹺，Cherry同場撞到佢讀緊林大輝中學嘅姨甥女，兩人梗係影番幅合照啦，估唔到一個場合大家都遇到咁多熟人。去年廠商會捐咗三千萬就有教學大樓命名，唔知今次一個廣場命名要捐幾多錢呢？大輝就四両撥千斤話：「教育嘅嘢，講心啫，唔係樣樣講金」。

第一手消息請下載on.cc東網iPhone/iPad/Android/Windows Phone Apps