港股屢創新高，撞正電視台重播經典劇集《大時代》，令人關注「丁蟹效應」會否令港股逆轉掉頭回落。點知民建聯（民記）最近竟然就「丁蟹效應」進行調查，據聞尋日公布調查結果前曾透過中間人邀請「丁蟹」鄭少秋現身記者會，但丁蟹最終請民記「食檸檬」。
據引述，秋官太太回覆話，秋官因要事未能出席，但都好關心今次「丁蟹效應」調查。
雖然秋官未有現身解讀「丁蟹效應」，但一如所料，市民對「丁蟹效應」認知度相當高。據知今次調查訪問咗六百多人，約八成七受訪市民知悉「丁蟹效應」，但表示相信嘅只有一成二，唔相信嘅多達六成。
對於港股大時代睇法，近三成九人認為股市已經「癲咗」，三成五人表示唔同意，另擁有五年以上投資股票經驗嘅人，比其他人更傾向唔同意近期股市已經「癲咗」。由此觀之，似乎外間或多或少誇大「丁蟹效應」嘞！