政情：選舉處新策 幫政黨趕客

建制泛民怒轟矯枉過正

立法會政制事務委員會尋日討論《區議會選舉活動指引》，多名建制、泛民議員追問抽查選民住址一事。民建聯李慧琼率先發炮，批評選舉事務處用掛號信方式寄信畀選民核實地址，如果兩星期內唔回覆就會取消選民資格，完全係增添麻煩畀選民，要求選舉事務處用書面文件解釋清楚。

漁農界何俊賢（高佬賢）講起呢個議題都好勞氣，批評處方抽樣檢查係唔了解區情，好似佢所屬界別嘅漁民，成日要出海打魚，質疑處方點解唔安排職員上門抽查。高佬賢話，朋友畀過封信佢睇，信入面只有兩個選項，一就係確認住址正確，二係確認已搬離原址，反問既然回覆到處方，為何仲要附上住址證明？議員梁美芬亦批評核實信件擾民，如果冇住址證明就要搵太平紳士做擔保，相當搞笑。

社民連梁國雄（長毛）就問，如果有人主動打電話確認住址得唔得，例如係提供身份證頭四個號碼，事關好多過千萬嘅銀行理財服務都係咁交易。無論建制派或泛民都怒轟選舉事務處嘅新措施矯枉過正，隨時搞到好多人冇得投票，等於令佢哋流失票源。

逾期回覆可打熱線求助

選舉事務處總選舉事務主任李柏康回應話，選民唔一定要喺兩星期內回覆，七月二日先係限期，即使過咗限期，選民都可以透過程序申索，或打熱線電話求助。佢又話，唔評論高佬賢嘅個別案例，只係話寄得信都有懷疑基礎。至於長毛嘅問題，佢就話一定要書信先可以確認，因為書信附有當事人簽名，簽咗就需要負擔法律責任咁喎。