中環出更：白鴿內訌 AV仁扮黨鞭
民主黨（白鴿黨）老鴿黃成智、狄志遠及羅致光近日先後發聲，呼籲泛民主派對政改「袋住先」，令黨內激進乳鴿不滿。點知黃成智日前仲發起一人一信聯署行動，利用民意逼泛民考慮「袋住先」，搞到AV仁尋日聯同激進乳鴿許智峯召開記者會，齊聲譴責黃成智，AV仁仲扮「黨鞭」警告若不取消聯署行動，就凍結黃成智嘅黨籍。不過，AV仁條「鞭」竟不及許智峯硬淨，事關許直情叫溫和老鴿退黨，唔好連累大家，睇嚟AV仁早啲收檔好過！
黃成智搞聯署 或被凍結黨籍
AV仁話作為資深黨員，對黨嘅紀律好熟悉，又話該黨元老司徒華（華叔）在生時，就好似條黨鞭咁，各黨員都嚴守紀律同團結，但華叔過身後，個黨就冇咗條黨鞭，令個黨冇晒紀律。佢又指黃成智有權利去爭取黨員支持「袋住先」立場，但對外收集簽名，就係同個黨以至泛民嘅意向相違背及對着幹，影響黨聲譽。
AV仁又話，若黃成智繼續聯署行動，佢就會考慮要求黨召開緊急中委會議，凍結黃成智嘅黨籍。至於許智峯就貫徹激進風格，呼籲溫和黨員慎重考慮退黨，另建溫和派旗幟，仲笑佢哋係未打先放棄嘅「投降派」。AV仁喺呢個時候再次劃清界線，話叫人退黨係許智峯嘅講法，佢只係針對黃成智嘅紀律問題，以及用個人身份表達，真係又要威又要戴頭盔。
卓妮