中環出更：名人行膳 齊助自閉童
為發展障礙兒童提供支援嘅協康會，早前喺灣仔君悅酒店舉行「全港廚師精英大匯演」籌款活動，唔少城中名人買慈善餐券請朋友去擦餐飽，包括連續多年贊助活動嘅太子珠寶鐘錶副主席兼執董鄧宣宏雁（Emily）。Emily話，好多人對自閉症嘅了解有限，所以急需社會施援及早發現治療，咁情況就可以有好大改善。
今次籌款活動，共有五十多位城中星級名廚齊聚炮製佳餚，出席嘅名人包括房協主席楊家聲、市建局主席蘇慶和、愛沙尼亞共和國駐港名譽領事林建康夫婦等，個個現身做善事兼擦餐飽。協康會主席歐陽卓倫就話，目前政府只提供約六千個資助名額，但仍有六、七千人輪候，自閉症患者包括有語言及社交障礙，好多時不被察覺，若延誤治療，情況將進一步惡化，實在令人擔憂。
鄧鉅明炒股往績「好悲哀」
Emily嘅丈夫太子珠寶鐘錶主席鄧鉅明（Jimmy）亦有到場，講到近期股市熱潮，佢自爆炒股往績係一段「好悲哀」嘅故事。話說Jimmy曾經期貨、股票乜都炒，但乜都輸，後來決定轉做長期投資者，喺恒生指數七千二百點時以一百二十五元買入滙豐，點知依家恒指升到兩萬七千五百幾點，但滙豐股價只得七十五元，真係陰功。難怪Jimmy笑自己嘅「明燈」效應仲勁過丁蟹喎！不過，後來佢轉為炒樓，投資收益仲勁過股票啦！
卓妮