香港競爭力排名跌跌不休，早就唔係新聞嘞，最近終於有樣嘢攞咗全球第一，可惜唔係光榮，而係恥辱。聰明嘅讀者一定估到，咪就係包括高鐵在內嘅三條鐵路不斷延誤同超支，搞到成本貴絕全球囉。「東方報業民意調查」顯示，受訪者一面倒批評港府監管不力，基建項目如同財政無底黑洞，隨時淪為大白象工程。
嗱，先講是非多多嘅高鐵香港段吖，短短二十六公里，造價由○一年估計嘅六百五十億元，增至早前嘅八百五十億元，家陣估計係九百億元，簡直沒有最貴，只有更貴。反觀高鐵深圳段全長一百一十多公里，造價唔夠兩百億港紙。同樣係高鐵，有冇理由成本相差十萬八千里吖？
西港島線嘅造價就更加得人驚，全長三公里咋，造價竟然高達一百八十五億元，即係平均每公里造價超過六十一億元，打破咗英法海底鐵路嘅最高紀錄，成為全球冧巴溫。沙中線不遑多讓，長度十七公里，估價高達七百九十八億元。呢度浪費百幾億，嗰度虛耗幾百億，就算庫房水浸都遲早乾塘啦。
正如「東方報業民意調查」顯示，四成受訪者要求盡早搵出核心問題，為項目止血；三成批評政府部門監察不力；兩成五擔心工程隨時變成無底洞。市民就講得啱嘞，三條鐵路都係由公帑興建，任由工程一拖再拖，即係浪費納稅人嘅血汗錢啫，最近審計署有意介入調查，唔該係就快手嘞。
高鐵作為國家級重點工程，變咗醜聞工程唔在講，一地兩檢拖到家陣都未解決就更加大鑊嘞。學立法會議員話齋，如果今年九月中央都仲未拍板，九龍總站嘅工程就唔可以如期招標，一七年肯定通車無望。你話嘞，冇咗一地兩檢嘅高鐵仲慢過直通車，起嚟把鬼咩！難怪三成八受訪者直指高鐵吸引力大減；兩成七直斥欺騙市民；兩成四擔心香港段或得物無所用。
講真，鐵路工程唔係延誤就係超支，授人以柄，當局想再攞撥款填氹喎，過唔過到立法會嗰關真係好難講。家陣社會泛政治化，乜都拗餐飽，尤其係一地兩檢涉及內地部門在港執法，爭議肯定極大，反對派仲唔乘機玩嘢咩。所以話，繼續咁拖落去，高鐵爛尾真係一啲都唔出奇。
冇計喇，千錯萬錯，最錯就係前朝貪曾政府。貪曾好大喜功不特止，仲要將多個鐵路工程同一時間上馬，搞到成本節節上升。加上現屆政府監管不力，政客搞風搞雨，納稅人被迫做冤大頭，呢啲咪叫善財難捨，冤枉甘心囉。