政情：公民講場：泛民拉布成魔 財爺斥搞破壞

立法會激進泛民主派議員繼續就財政預算案撥款「拉布」，保守估計要到本月底先有望通過，或會影響到六月初嘅公共服務開支。財政司司長曾俊華（鬍鬚曾）尋日就喺網誌發炮，借八十年代初電視劇《飛越十八層》主題曲《難為正邪定分界》嘅歌詞，「努力興建，盡情破壞，彼此也在捱」，指政府同事「努力興建」，但有議員就好似劇中魔鬼咁借「拉布」「盡情破壞」，如果唔停止「拉布」，只會拖延大量撥款，嚴重影響民生，令到市民就真係「彼此也在捱」嘞！鬍鬚曾今次用到魔鬼嚟形容「拉布」議員，唔知下次又有咩新招呢？