香港愛國陣營呢塊大版圖，除咗建制派政黨外，大大小小嘅省級社團都係不容忽視嘅力量，每逢選舉都肩負起地區樁腳及催票員嘅角色。近年香港一直由福建、廣東及廣西三大社團雄霸，反觀人力物力都充足嘅上海幫，反而冇乜「成績」。
據聞有關方面都感到香港上海幫有一盤散沙迹象，所以催生出「江蘇社團總會」，希望藉此提升愛國愛港陣營嘅力量，亦希望能平衡各大社團勢力。
最近各大社團都忙於發起撐政改簽名活動，偏偏喺眾多社團之中，就好少見上海幫出現。不過，形勢隨時有機會逆轉，因為涵蓋幾十個屬會嘅江蘇社團總會（總會），本周三會舉行成立典禮，聽講總會已獲北京「祝福」，而全國政協常委唐英年（唐唐）將擔任召集人，負責做總舵手一統香港上海幫，並用盡政界人脈關係網，所以大家要留意典禮當日，到底有咩人肯捧場，隨時睇到有啲端倪。
有政圈中人話，唐唐要完成呢個任務都唔簡單，事關上海幫喺香港已經有好耐歷史，要將一班平時好錫身嘅富商拉埋一齊已經好難，再要佢哋好似其他社團咁仆心仆命撐政改，真係幾考功力。