中環出更：高永文唔敢遠遊 明寸廢鑊？
好多政府高官一到假期就掛住飛去外遊，若香港有咩大事發生，隨時要取消休假急急返港處理。食物及衞生局局長高永文尋日出席網台節目時，就寸爆上一任局長周一嶽（周一鑊）曾經遠遊歐洲，但點知香港有突發事情，結果被急召回港處理。高永文話呢次事件後，佢逢親放假都只敢放四至五日，而且只會去亞洲旅行，飛遠少少都驚喎。
周歐遊曾被急召返港
高永文尋日接受立法會議員蔣麗芸嘅網台節目訪問時自爆，上任後從未放過長假，每次去旅行更只限於亞洲，歐洲就一定唔敢去，因為佢聽聞當年周一鑊試過飛去歐洲度假，但中途被急召返港處理公務。
卓妮翻查過資料，周一鑊喺○五年四川爆發豬型鏈球菌疫情時，就因為要留港防疫而取消歐遊，唔知道高永文係咪講呢單呢？另一單係一○年馬尼拉人質事件慘劇，周一鑊又係掛住外遊冇蒲頭，要副局長梁卓偉頂硬上，但佢竟然死撐自己有遙控善後工作，做局長做到咁hea，唔怪得佢任內頻頻爆鑊嘞！
卓妮