係人都知，中華飲食文化博大精深，各大菜系百花齊放。原來，黑心食品文化亦不遑多讓，兩岸三地唔止各自精彩，而且互相「取長補短」，簡直令人防不勝防，寢食難安。
嗱，話口未完又嚟喇。今次又係台灣出品，新北市一間號稱全台最大規模嘅海參專賣店，被踢爆涉嫌以工業用化學品浸泡海參，先從洪都拉斯低價購入灰白色海參，再以工業用冰醋酸浸泡脫灰，最後用蘇打粉處理，變成賣相吸引嘅黑玉參，以近五倍價錢出售牟利，其中九成銷到廣東同香港，問你怕未。
不可不知，冰醋酸具有腐蝕性，係「香港腳」外搽藥膏嘅主要成分，聽落已經夠恐怖，仲要係工業用冰醋酸，更加令人不寒而慄。該公司負責人話喎，聽咗大陸人「教導」，至識得用呢種化工原料令劣質海參賣相變得更吸引，從未喺台灣賣過。
喂，己所不欲，勿施於人，台商炮製嘅黑心海參唔敢喺台灣賣，專賣畀內地同香港人，擺明靠害啫。正所謂，沒有最可怕，只有更可怕，大陸黑心食品氾濫成災早就唔係新聞，原來台灣不過係五十步笑一百步，可以講係一擔擔。淨係呢幾年咋，台灣已先後爆出塑化劑、毒醬油、毒澱粉、劣質米充優質米、吊白塊餅皮、黑心鴨血、黑心豆乾、工業用豬油充食用油等等食安醜聞，簡直係鑊鑊新鮮鑊鑊甘。就講搞到兩岸三地冇啖好食嘅台灣黑心油事件吖，有人將入口劣質豬油當食用豬油出售，買家再加工製造出多款「精製豬油」銷到各連鎖店，兩岸三地消費者齊齊中招。
事實證明，唔止大陸食品安全防線失守，台灣同告淪陷，香港亦唔好得去邊，黑心食品幾乎無日無之。香港話就話有食安中心負責把關，可惜食安官僚一向後知後覺，甩甩漏漏，經常要等到傳媒踢爆或者外地揭發，至識得補鑊。呢，除咗前幾年嘅孔雀石綠魚、蘇丹紅雞蛋、三聚氰胺等等，舊年嘅麥當勞「過期肉」事件同台灣坑渠油事件，更暴露出港產官僚敷衍塞責，把關不力。
冇法子嘞，今時今日人人向錢看，無良奸商為咗一己私利，連呃帶騙毒害同胞，搞到黑心食品禁之不絕，正正係中國人劣根性嘅集中體現。中國人醜陋，內地係咁，台灣係咁，香港亦唔例外，全世界冇一個民族會咁樣自相毒殺。當年日本仔譏笑中國人係東亞病夫，今日睇嚟唔係完全冇理由，最怕再咁落去，中華民族滅種都有可能，又點止病夫咁簡單！