政情：曾鈺成生日「四字」懶神秘
聽日係立法會主席曾鈺成六十八歲生日，一眾立法會議員尋日預早同佢切蛋糕慶祝，被問到生日願望係乜嘢時，壽星公就懶係神秘咁答︰「四個字」，仲話唔可以講出嚟，因為驚講咗就唔靈喎！眾議員就起哄玩猜謎語，問佢係咪「政改通過」、「當選特首」，一聽到後者時，曾鈺成就笑笑口叫大家唔好玩佢，總之佢個願望一定係對香港好咁話。
曾太現身畀驚喜
記得前兩年曾鈺成都係同另一名壽星女立法會議員蔣麗芸（Ann）一齊過，而且阿Ann會獻吻，尋日阿Ann另有飯局冇出席，曾鈺成太太就變成神秘嘉賓畀壽星公驚喜。曾太好怕醜，大家起哄叫佢錫曾鈺成一啖時，但佢就扭扭擰擰，眾人威脅若曾太唔錫就由立法會議員何俊賢送吻，曾太最後都只係攬咗老公一下算數。曾鈺成透露，太太已送咗一份好貼身嘅禮物畀佢。唔通係內衣？佢就賣關子話，希望佢用嘅時候大家見得到喇！