港府拍板通過機場擴建第三條跑道，不過泛民立法會議員對三跑一千四百億元造價及空域問題存疑，要求成立小組委員會跟進。立法會內務委員會尋日通過成立「跟進香港國際機場三跑道系統相關事宜小組委員會」，不過現時立會已有十個研究政策嘅委員會，所以最快都要暑假休會過後先可以開始運作，泛民得悉後甚為不滿。
議員梁國雄及李卓人就擔心，到時小組未完成報告，三跑可能已經開始興建，屆時就覆水難收，故要求政府承諾要得到立法會同意先可開工。
立法會秘書長陳維安就話，依家唔計法案委員會，已有十個有關政策事宜小組委員會，唔計三跑小組委員會都仲有三個小組委員會喺輪候名單上，而秘書處只能夠應付十個，所以三跑小組委員會要排隊輪候。
其實泛民同激進派議員大搞不合作運動，又成日「僭建」委員會，令立法會秘書處不勝負荷，今次都係佢哋作繭自縛啫！