政情：民協老巢 朝不保席
由於區議會委任議席將會喺今年壽終正寢，令年底舉行嘅區議會選舉將增加十九個議席，各大政黨都對於呢塊肥肉虎視眈眈。其中民協老巢深水埗將會增加兩席，據聞民協準備派出新人何啟明同多屆議員覃德誠去開發新區，覃本來穩坐嘅幸福選區就計劃由新人周穎恆頂上，希望增加民協喺深水埗區議會嘅議席。不過，佢哋嘅如意算盤恐怕無咁容易打響，事關建制派已經大舉在深水埗「插旗」，更加以「人盯人」方式狙擊民協。民協一唔小心，分分鐘因加得減。
民協依家喺深水埗有七位區議員，其中一個係立法會超級議員馮檢基。我哋之前都提過工聯會（工記）將會派出小花陳穎欣出征，直搗阿基喺麗閣嘅地盤。
圖撼贏阿基再奪六席
最新消息係建制派嘅野心比想像中更大，唔單止要撼贏阿基，仲希望一舉奪走民協另外六席，佢哋計劃派出六個後生仔女（目及）實民協現任議員。六個新人來頭唔細，有青年民建聯副主席陳威雄及青年事務委員會委員謝曉虹，睇嚟建制派今次打後生牌，志在必得。
民協近年喺區選頻頻失利，仲記得阿基當年轉戰立法會超級議席時，被視為接班人嘅民協副主席譚國僑竟然連九龍西議席都保唔住，事後被指可能選舉策略失當所致。有政壇八卦友話，覃德誠本來喺幸福選區做得幾好，但係民協要佢去開拓新區，其實策略上好冒險。我哋問過譚國僑，佢就否認要覃德成讓區。佢解釋話，政府將幸福選區劃咗一半做荔枝角北，而覃德成一直以來有喺當區做地區工作，所以唔算係開闢新區。
譚國僑部署收復失地
講開譚國僑，上屆佢係深水埗區議會副主席，點知空降大坑東失利，結果議席都保唔住。既然傾開偈，我哋問佢點部署，佢話今次會收復失地喎！結果如何，大家拭目以待喇！