中環出更：分享畫樂 孫少文資助美術館
香港一地值千金，有物業收租不知幾和味。不過仁濟醫院總理孫蔡吐媚同丈夫孫少文就講心唔講金，近日將家族位於觀塘商廈內一個逾萬呎單位變身美術館，旨在分享賞畫樂。尋日由孫少文基金會資助嘅一新美術館舉行開幕禮，並展出首個中國畫展，吸引城中愛畫人士齊去捧場，包括明德學院校務委員會主席張永霖（Linus）夫婦及鄉議局主席劉皇發大仔劉業強等人。
現場展出多位知名大師珍品，包括齊白石、徐悲鴻、張大千，林風眠及饒宗頤嘅大作。Linus一早到場，一眼掃到館內有幅林風眠畫作，即快步上前睇真啲，仲睇到好入神。
張永霖買畫 要睇韻味
Linus淡出商界後醉心收藏，經常出席大小拍賣會尋寶。講起買畫，佢自有一套，就係唔睇畫家名氣，亦唔考慮升值潛力，最緊要係睇幅畫嘅韻味，而佢最愛係深沉嘅畫作。聽落真係頗為玄妙，無論點都好，買畫同買衫一樣，自己鍾意就得。
經常出入馬場嘅劉業強除咗鍾意跑馬，亦都好鍾意賞畫，佢話最欣賞齊白石同徐悲鴻嘅大作，間中亦會收藏西洋畫。到場賞畫嘅仲有藝術發展局主席王英偉、浸大校長陳新滋及南旋集團主席王庭聰大仔王槐裕等人。孫少文大女孫燕華（Chloe）及次女孫燕羚都有到場，身兼基金會主席嘅Chloe話，嚟緊仲會搞啲展覽及講座，希望市民有更多機會接觸藝術。
卓妮