天氣一日熱過一日，證明炎炎夏季已經來臨。不過對於旅遊及零售業來講，家陣直情係令人瑟瑟發抖嘅冬天。東方報業民意調查顯示，絕大部分受訪者直指五一假期熱鬧不再，生意淡靜，再咁落去，旅遊業遲早玩完。
衰開有條路，繼去年零售業銷貨價值出現十多年來首次下跌，今年首季又按年下跌百分之二點三。剛過去嘅五一假期，話就話訪港旅客人次有所上升，可惜只係虛火咋，事關好多旅客只係來港轉機，唔係過夜消費。有旅行社接團數目暴減八成，唔少酒店要減價促銷，零售業更要推出優惠救亡，就知道市道幾咁嚴峻嘞。
呢，最近金鐘一個高級商場公布業績，竟然出現大倒退，有大型連鎖珠寶金行仲打算結束部分分店添。正如有人話齋，零售業係整體經濟嘅寒暑表，香港經濟好定壞，唔使講都知嘞。「東方報業民意調查」顯示，三成四受訪者擔心零售業出現倒閉裁員潮；三成三憂慮人流減少引起連鎖反應；一成二認為本地人消費亦疲弱。
旅遊及零售業寒風刺骨，固然同港元走強、周邊地區貨幣貶值，以及內地旅客消費模式改變有關，但明眼人都知呢啲並唔係最主要原因，根本原因係香港自己唔爭氣。本來呢，有客自遠方來，不亦樂乎，偏偏只有香港例外，隔三差五就大搞「驅蝗」、「光復」趕客，係人都怕怕喇。當局執法不力唔在講，仲要向激進勢力低頭，將「一簽多行」改為「一周一行」，拒客訊息更加明顯。難怪三成二受訪者直斥趕客示威已經失控，禍及真正旅客；三成批評破壞香港旅遊業聲譽；兩成六認為香港成為趕客之都。
趕客嘅點止激進分子吖。香港租金高企，物價水漲船高，幾乎貴絕全球，以名牌手袋為例，香港高出南韓、日本二至四成，旅客識得揀，梗係唔揀香港喇。就算當局推出「開心著數大行動」救市，都幫唔到幾多咋。講真，今時唔同往日，以前內地好多方面要借鑑香港，但家陣內地發展一日千里，唔止自貿區愈開愈多，中央更計劃下調部分進口貨品關稅，香港仲有乜優勢可言呢？水貨客自動消失睇怕只係遲早嘅事。受訪者一面倒直指香港日漸邊緣化，競爭力所餘無幾，真係冇講錯o架。
香港旅遊業後繼無力，你知我知大家知。世界經濟論壇最近發表旅遊業競爭力報告，香港話就話全球排名十三，但價格競爭力只係排名一百二十七，再次敲響警號。香港繼續自甘墮落，內鬥內耗，打回原形變番小漁村又有乜出奇！