政情：葉劉批雙曾挫港競爭力
香港近年競爭力排名不斷倒退，有份見證香港競爭力「興衰」嘅立法會議員葉劉淑儀尋日狠批「雙曾」，包括批評「貪曾」前特首曾蔭權爵士當年提出大搞六大優勢產業，至今仲係「發展模糊」；而「鬍鬚曾」財政司司長曾俊華就一味講競爭力自由度，軟實力、硬實力及創新力就忽略晒。
有見及此，葉劉做主席嘅匯賢智庫將會用十五個月時間，做一個本港長遠競爭力研究，睇吓支柱同新興行業仲有咩發展機會，當中特別同「全國港澳研究會」合作，睇吓內地新設自貿區等對香港會造成咩影響。研究搵嚟多個界別專才加入督導委員會畀意見，包括工商專業聯會主席黃友嘉、金銀業貿易場監事長張德熙及旅遊界立法會議員姚思榮等。
何濼生：香港被「陰乾」緊
不過，葉劉強調，研究唔係要追究邊個責任，只想搵出香港究竟出咗咩事，再將結果同建議交畀政府。負責研究嘅嶺南大學經濟系教授何濼生就話，香港依家好似被人「陰乾」緊，再唔長進就會繼續墮後，搞到葉劉臨尾都忍唔住好慨嘆咁話，港人以至政府都係時候反省下嘞。