中環出更：「哈佛小甜甜」出戰香港仔區選？
近年香港開始出現娛樂圈人從政現象，好似人民力量陳志全（慢必）、袁彌明，嚟緊區議會選舉分分鐘又多一位。聽聞有「哈佛小甜甜」稱號嘅前港姐任葆琳（Pauline），正考慮參選年底區議會選舉，近期仲不時現身南區香港仔做社區工作，連宣傳橫額及直幡都印好晒，睇嚟唔似係傳聞咁簡單。
任葆琳97年港姐最後五強
南區香港仔現時係「小巴大王」黃靈新選區，但消息人士話佢因為健康理由而將會退下火線。有地區人士話，近期見到Pauline喺香港仔好活躍，唔少活動都有參加，且仲同黃靈新齊齊出席，莫非黃靈新真係「傳位」畀呢位前港姐？Pauline回覆時承認，佢一直喺香港仔做地區工作，但究竟係咪參選，佢就無正面回應，話遲啲再講喎。
Pauline喺九七年參選港姐，雖然唔係三甲，但都殺入最後五強。事隔十八年，Pauline到現時仍然保養得唔錯，不時放自拍相上社交網站。唔好以為選過港姐就一定係花瓶，佢當年喺哈佛大學攻讀電腦學先返港參選，可以話係真正「美貌與智慧並重」。樣靚又有智慧已經贏在起跑線，唔知佢最終贏唔贏到市民歡心呢？
卓妮