中環出更：抱孫 提款卡 最佳母親節禮物
為人子女每年母親節都出盡法寶氹媽咪開心，但前立法會議員蔡素玉認為每日都係母親節，佢亦早已送咗張提款卡畀媽咪，等媽咪想買咩都得，所以尋日冇再特別選購禮物，一家人簡簡單單吃晚飯已經好滿足。香港南京總會創會會長張心瑜尋日朝早就收到孫仔提早出世嘅好消息做最佳禮物，話為人母親近三十年，今年最驚喜難忘。
話說張心瑜前晚如常到深圳準備打高爾夫球，估唔到尋日清晨一開波就收到大仔來電，話本來預產期係本月十六日嘅孫仔提早幾日出世同佢慶祝母親節，咁開心佢梗係要即刻衝返香港啦，仲話呢份係咁多年來最特別嘅母親節禮物！有孫萬事足嘅仲有香港中華出入口商會副秘書長許華傑媽咪，尋日許華傑帶埋囝囝及妹妹等家人齊齊同媽咪飲茶慶祝，最希望媽咪身體健康。
高永文籲唔好嫌媽咪長氣
唔少人會嫌媽咪長氣，食物及衞生局局長高永文曾經都係其中之一。尋日佢喺母親節步行籌款活動主動分享往事，話媽咪雖已去世多年，但仍懷緬媽咪以前不時同佢講關於家鄉嘅事物，咩都講一餐，有時都覺得好囉嗦，但目前就感慨自己年輕時太早工作，做醫生又太忙，經常無暇陪媽咪，到依家想聽都無得聽，感到後悔，希望天下子女唔好嫌媽咪長氣，珍惜相處時光。
教育局局長吳克儉尋日話，佢早前已同年過八十歲嘅媽咪飲茶提早慶祝，仲教媽咪用智能電話，尋日傳咗首「世上只有媽媽好」氹媽咪。問佢點解唔親自唱，佢就話：「Send（傳）咗當唱咗啦！」
卓妮