今日母親節，係全世界所有母親嘅大日子，你準備點樣同媽媽慶祝呢？計功夫茶話齋，既要講金，更要講心，除咗飲茶吃飯，或者送上鮮花之外，最緊要講聲：媽媽，我愛你！
今時今日嘅香港，衣食住行樣樣煩，做人難，做母親更難，佢哋最應該受到關心。呢，有項針對婦女嘅調查發現，九成受訪者受到唔同程度嘅精神問題困擾，當中分別有四成及兩成人認為，工作及家庭係引致精神困擾嘅主因。而另一項調查就顯示，近兩成受訪母親覺得自己唔幸福，比舊年同類調查多咗近三個百分點，相反，覺得自己幸福嘅比例就跌咗三個百分點，兩者此消彼長，證明愈來愈多母親唔開心。
點解咁多母親唔開心？睇下受訪者心目中最影響生活嘅三大因素，就知道答案嘞。首先係物價太貴，其次係退休生活冇保障，最後係工時太長，呢三項因素直接影響家庭生活質素，母親又點會開心，點會幸福吖！
大家都知，好多香港婦女既要主內，又要主外，身為一家之「煮」，除了工作壓力之外，對物價亦特別敏感。表面上，本港通脹率維持喺低水平，弊在同基層市民息息相關嘅食物、生活用品以及租金、公共交通年年加價，而打工仔人工升幅又永遠跑輸通脹，都幾難開心。前排英國智庫公布全球生活成本最高嘅十大城市，香港超過日本，排名第九，十二年來首次打入十大，可見香港生活愈來愈艱難，唔怪得受訪婦女母親節最大嘅願望係「物價唔好咁貴」喇。
而講到退休生活冇保障，更加係基層嘅悲哀，港府嘅恥辱。推行全民退休保障計劃早就成為社會共識，點知港府一直置若罔聞，連舊年學者團隊建議設立全民老年金，當局亦一拖再拖，睇怕最後又係不了了之。你話嘞，港府坐擁龐大財政儲備，連最基本嘅責任都唔肯承擔，係咪涼薄到冇朋友吖。
其實，幸福好簡單嘅咋。最多受訪婦女揀「身體健康」，其次係「有美滿和諧家庭」，亦有唔少人認為「子女聽話」最幸福。冇錯嘞，子女生生性性，可以令母親拋掉煩惱，心情都愉快啲喇。呢，可能因為早前港股爆升啩，唔少子女今日同媽咪食飯都疏爽咗，酒樓一早已訂滿枱，就算分兩輪亦一樣爆滿，睇見咁熱鬧，為人母親者真係幾欣慰。
一句講晒，母愛最偉大，無論子女點樣感恩報恩，都只能表達一點心意，最重要係令媽媽永遠幸福快樂。世上只有媽媽好，祝母親節快樂！