政情：區選前瞻：富君混戰 城大生「裝」成熟
屬於西貢區議會嘅將軍澳區，近年有大量新樓入伙，人口急升，令該區喺嚟緊嘅區議會選舉一次過大增三個新選區同議席，成為各黨派必爭之地，多區都有同時超過一個建制派同一個泛民政團派人參選，候選人要突圍而出認真唔容易。其中年僅廿一歲、仲有個零月先叫正式畢業嘅城大中文系學生陳展浚（Cyrus），極可能成為呢場大混戰嘅最年輕參賽者。
落區必着全套老西
Cyrus有意參選其中一個新增選區富君區，主因係佢本身喺該區附近居住。佢自知選區議會唔同選學生領袖，單靠年輕或型仔唔會贏得到，所以佢每次落區都會換番成套恤衫、西褲、西裝褸加皮鞋，希望畀啲選民覺得佢專業啲同老成啲。
Cyrus三年前幫過民主黨前立法會議員黃成智助選，之後兼職做區議員助理，最終決定以白鴿黨名義出選，變身「超乳鴿」。不過，佢亦表明唔同意「師傅」黃成智支持「袋住先」嘅立場，認為對方身為中委，唔應該公開發表同個黨不同嘅立場。